Dr. Thangtea chuan FCAA 2023 Guidelines & Rules thar Section 1A(2) bik hi Mizoram tana him lo lai ber niin, hei hian Forest (ramngaw) in a huam tawh loh turte a rawn tarlang a. Central Sorkarin State Sorkar phalna lak kher ngai lovin, International Border aṭanga boruak mela Km 100 huam chhungah, ram venhimna lam kaihhnawihah te, Sorkar Laipuiin ṭul a tihna leh an duh angin kan ram chhungah kut an rawn thlak thei tawh dawn a ni, a ti.

ZPM sorkarin FCAA 2023 pumpui a adopt vek mai hian India Danpui chhunga kan humhimna Article 371(G) a rawn palzut a, Central kutah State thuneihna kan pe vek tihna tluk a ni. Kan hnam Pasalṭhate sual chhuah Article 371(G) thuneihna lek duh lova, ram chhunga kan thuneihna zawng zawng pawh midang kuta hlan vek duhna hi ram leh hnam pawi sawina lian tak a ni bawk, a ti.

Dampa bial hi International Border depa awm a ni a, FCAA 2023-ah hian ram venhimna kaihhnawih thil engpawh, sak leh bunna tura hman tur hectare 10 thlenga zauah State sorkarin thuneihna kan nei dawn lo tih Section 1A(2)(c)(ii) ah a chuang bawk tih sawiin, "Dampa bial chhungah agriculture sector lama hmalak kan tumna ram ṭha zawng zawngte hi Central Sorkarin an duhna ang angin rawn hmang mah se engmah sawi theih kan nei dawn tawhlo tihna a ni", MNF Senior Vice President chuan a ti.

Chuvangin kan Chief Minister Pu Lalduhoma’n 'dan sakei' a lo tih hial tawh, a kaihhruai sorkarin a adopt tak FCAA 2023 hi kan ram tan a him lohna ngun takin chhut nawn leh sela, huai taka sut leh turin Pu Lalduhoma kaihhruai ZPM Sorkar hi ka phût nawn leh a ni, a ti a.

Dr. Thangtea, MNF Senior Vice President chuan naktuka MNF-in 'FCAA sut leh tura Total Bandh' Mizoram hmun hrang hranga buatsaih tur chu ram hnuk khawih tak meuh anih avangin Zoram mipui zawng zawngte chu thlawp vek turin a ngen nghal bawk.